Претседателот на Република Северна Македонија, Стево Пендаровски ја одликуваше Организацијата на обединетите нации со Орден на Република Северна Македонија.

Организацијата се одликува за големата помош и поддршка при справувањето со последиците од катастрофалниот скопски земјотрес во 1963 година и за непроценливиот придонес за обновата на градот Скопје, којшто прерасна во град на солидарноста и вистински симбол на пријателството меѓу народите.

Орденот на Република Северна Македонија е највисокото државно одликување и се доделува на најистакнати личности, на владини и невладини организации, здруженија, како и на шефови на држави и на влади кои имаат посебни заслуги во остварување на сувереноста и независноста на Република Северна Македонија, кои придонеле за развивање и зацврстување на соработката и пријателските односи со други држави и придонеле за афирмирање на земјата во сите сфери на општествениот живот.