Претседателот на Република Северна Македонија, Стево Пендаровски одликуваше припадници на Армијата на Република Северна Македонија со Медал за храброст и Медал за учество во хуманитарни или мировни операции.

Шеесет припадници на Армијата се одликуваат со Медал за храброст за нивните натчовечки напори како припадници на армискиот тим кој меѓу првите странски контингенти пристигна за помош по стравичните земјотреси во Турција во февруари 2023 година.

Тринаесет припадници на Армијата се одликуваат со Медал за учество во хуманитарни или мировни операции како првите македонски мировници во Авганистан, кои на 8 септември 2002 година го означија почетокот на нашиот ангажман и придонес за меѓународниот мир и безбедност.

Ова е прво доделување на Медалот за учество во хуманитарни или мировни операции, по неодамна донесената одлука за изгледот на медалот.

Медалот за храброст се доделува на припадници на безбедносните сили на Република Северна Македонија за искажана лична храброст и самопрегор на полето на одбраната, или во заштита на човечки животи или материјални добра во опасни ситуации.

Медалот за учество во хуманитарни или мировни операции се доделува на припадниците на безбедносните сили, како и на граѓаните на Република Северна Македонија ангажирани во активности во хуманитарни или мировни операции надвор од територијата на Република Северна Македонија.